Қазоқистон ба Тоҷикистон кумаки башардӯстона ирсол мекунад

Душанбе, 13.05.2016.(АМИТ «Ховар»). Дирӯз аз Ҷумҳурии Қазоқистон ба Ҷумҳурии Тоҷикистон кумаки башардӯстона ворид гардид.
«Ин кумаки башардӯстонаро 500 тонна орд, аз он 250 тонна орди навъи якум ва 250 тонна навъи дуюм, 5 тонна чой, 40 тонна макарон, 130 қуттӣ консерваи ширӣ, 90 тонна равғани маска, 5 тонна меваҳои хушк, 90 қуттӣ консерваи гӯштӣ ба маблағи умумии 872977доллари амрикоӣ ё 289828000 тенгаи Қазоқистон ташкил медиҳанд, ки мувофиқи Қарори Ҳукумати Ҷумҳурии Қазоқистон ба Ҷумҳурии Тоҷикистон ворид шуда истодааст»,- гуфт Абдукарим Раҳимов, сардори раёсати Агентии захираҳои моддии давлатии назди Ҳукумати Ҷумҳурии Тоҷикистон.
Ин кумак танҳо дар асоси Қарори Ҳукумати Ҷумҳурии Тоҷикистон ба зарардидагони Ҷумҳурии Тоҷикистон тақсим карда мешавад. Агентӣ ҳамчун мақоми ваколатдор онҳоро дар анборҳо ҷойгир намуда, ба Ҳукумат ҳисобот пешниҳод мекунад.