Баррасии ҳамкориҳои иқтисодии Тоҷикистону Олмон

Душанбе, 7.05.2016. /АМИТ «Ховар»/. Дар доираи иштироки ҳайати Тоҷикистон дар кори 49-умин ҳамоиши солонаи Бонки Рушди Осиё дар шаҳри Франкфурти лаби Майн мулоқоти вазири рушди иқтисод ва савдои Тоҷикистон Неъматулло Ҳикматуллозода бо раиси бахши олмонии комиссияи байниҳукуматии Тоҷикистону Олмон оид ба ҳамкориҳои иқтисодию тиҷоратӣ Андреас Гис баргузор гардид. Дар рафти суҳбат ҷонибҳо ҳамкориҳои дуҷонибаи ҳарду кишварро мусбӣ арзёбӣ намуда, ҷиҳати рушди ин раванд дар давраи минбаъда пешниҳодҳои мушаххас ироа намуданд.

Ҷониби Тоҷикистон оид ба омодагии худ барои дар сатҳи баланд баргузор намудани ҷаласаи навбатии Комиссияи байниҳукуматии дуҷониба давоми нимсолаи дуюми соли ҷорӣ дар шаҳри Душанбе маълумот дод.