«Бавария» маротибаи 18-ум Ҷоми Олмонро ба даст овард

Душанбе, 24.05.2016 /АМИТ «Ховар»/. Тими футболи  «Бавария»-и Олмон чанд давр пеш аз анҷоми мусобиқоти қаҳрамонии кишвар мақоми аввалро соҳиб шуд.  Дар Олмон барои дарёфти Ҷоми футболи кишвар тимҳои «Бавария»  ва «Боруссия» ҳамчун довталаб талош ба харҷ доданд. Вақти асосӣ ва иловагӣ ғолибро муайян накард, зеро бозӣ тайи 120 дақиқа бидуни задании гол дар майдони муҳташами «Олимпиаштадион»-и шаҳри Берлин поён ёфт.
Дастаи футболи «Бавария» бо истифода аз анҷом додани силсилазарбаҳои 11- метра ғолибиятро бо ҳисоби 4:3 бар ҳарифи доимӣ ва саркаши худ «Боруссия»  ба даст овард. Бахт ба рӯи шогирдони Пеп Гвардиола хандиду «Бавария» шаҳди пирӯзӣ чашид ва маротибаи 18-ум Ҷоми Олмонро соҳиб шуд.
Дар тӯли таърихи футболи Олмон ин натиҷаи рекортист, зеро то ҳол ба ягон тими футбол муяссар нагардидааст, ки 18 маротиба Ҷоми Олмонро соҳиб шавад.
Ёдовар мешавем, ки ин охирин бозии «Бавария» таҳти роҳбарии Пеп Гвардиола буд, зеро ин мутахассиси испанӣ Олмонро тарк мекунад ва дар мавсими оянда дастаи футболи «Манчестер- сити»-ро роҳбарӣ хоҳад кард.