Беш аз 200 кило бангдонаи худрўй дарёфт ва мусодира гардид

Душанбе, 30.05.16. /АМИТ «Ховар»/. Ҳангоми гузаронидани амалиёти Кӯкнор-2016, аз ҳудуди заминҳои бекорхобидаи назди хоҷагии деҳқонии Дӯстӣ-и ҷамоати деҳоти Палдораки ноҳияи Мастчоҳ  20 ҳазор бех  ниҳоли худрӯйи бангдона  дарёфт ва  мусодира  карда шуд. Мувофиқи маълумотномаи ташхисӣ ниҳолҳои дарёфтшуда, намуди бангдонаи худрӯй буда, вазнашон 48 килою 500 грммро ташкил медиҳад.
Худи ҳамон рӯз, кормандони милитсия ҳамчунин аз ҳудуди заминҳои хоҷагии деҳқонии С.Урунхуҷаев-и ҷамоати деҳоти Унҷии ноҳияи Б. Ғафуров 130  ҳазор бех  ниҳоли  худрӯйи  бангдона  дарёфт ва  мусодира  намуданд, ки вазни умумиашон 153 килою 200 граммро ташкил медиҳад.
Дар давраи гузаронидани амалиёти «Кӯкнор-2015» оид ба ҳодисаҳои муомилоти ғайриқонунии маводи нашъадор 441 парвандаи ҷиноятӣ оғоз шуд, ки аз онҳо 8-то бо моддаи 204 КҶҶТ (Парвариши ғайриқонунии зироати дорои моддаҳои нашъадори кишташон манъшуда) ва 3-то бо моддаи 205 КҶҶТ (ташкил ё нигаҳдошти  фасодхона барои истеъмоли воситаҳои нашъадор ё моддаҳои психотропӣ) банду баст шуданд. 142 ҳодисаи рӯидани буттаҳои худрӯи бангдона ошкор шуд ва онҳо бо роҳи даравидан ва минбаъд ба таври сӯзонидан нобуд карда шуданд.