Дар Академияи илмҳо фаъолияти илмии олимон натиҷагирӣ гардид

Душанбе, 6.05.2016 /АМИТ «Ховар»/. Имрӯз дар Академияи илмҳои Ҷумҳурии Тоҷикистон ҷаласеи васеи Раёсати АИ ҶТ баргузор шуд.
Тавре аз дафтари матбуоти Академияи илмҳо ба АМИТ Ховар хабар доданд, дар ҷаласа натиҷаи арзёбии фаъолияти илмӣ ва илмӣ — ташкилии Институти масъалаҳои об, гидроэнергетика ва экологияи АИ ҶТ ва оид ба натиҷаи арзёбии фаъолияти илмӣ ва илмӣ — ташкилии Институти зоология ва паразитологияи ба номи Е.Н. Павловскийи АИ ҶТ масъалаҳо баррасӣ шуданд.
Дар маълумоти пешниҳодшуда аз ҷониби раисони Комиссия бурду бохти муассисаҳои мазкур баҳогузорӣ шуда, баъзе норасоиҳо дар фаъолияти илмӣ ва илмӣ — ташкилии муассисаҳои мазкур тазаккур дода шуданд. Қарорҳои дахлдори Раёсати АИ ҶТ оид ба фаъолияти Институти масъалаҳои об, гидроэнергетика ва экологияи АИ ҶТ ва Институти зоология ва паразитологияи ба номи Е.Н. Павловскийи АИ ҶТ қабул гардидаанд.
Дар анҷоми ҷаласа президенти АИ ҶТ, Фарҳод Раҳимӣ тазаккур дод, ки раъйпурсии умумихалқӣ, ки дар 22 майи соли 2016 баргузор мегардад, аҳамияти таърихиро ҷиҳати ворид намудани тағйиру иловаҳо ба Конститутсияи Ҷумҳурии Тоҷикистон доро мебошад.