Дар Файзобод ба ифтихори Рӯзи Ғалаба ҳамоиши идона доир гардид

Файзобод, 10.05.2016 /АМИТ «Ховар»/. Ба ифтихори таҷлили Рӯзи Ғалаба 9 майи соли равон дар боғи фарҳангии ноҳияи Файзобод ҳамоиши идона бо иштироки шаҳрвандони тамоми қишрҳои ҷомеа, хурду калон, пиру ҷавон, иштирокдорони ҷанги Афғонистон, собиқадорони меҳнат ва маросими гузоштани гулчамбар дар назди муҷассамаи шаҳидони ҶБВ баргузор гардид. Инчунин дар боғи фарҳангии шаҳр бо иштироки ҳунармандони ҷавони Филармонияи давлатии ноҳия консерти идона ва сайри оммавӣ ташкил карда шуд. Дар арафаи ин ҷашни бошӯкуҳ масъулини Мақомоти иҷроияи ҳокимияти давлатии ноҳия туҳфаҳои пулии Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба иштирокдорони ҶБВ супориданд.
Аҳмад Бердиев, иштирокчии ҷанг мегӯяд, ки бо супориши махсуси Пешвои миллат муҳтарам Эмомалӣ Раҳмон пайваста моро кумак мекунанд ва сари вақт аз ҳоли мо бохабар шуда, мушкилотамонро ҳал мекунанд. Аз ин лиҳоз, аз ҳамаи ҷавонон хоҳиш менамоям, ки дар гирди пешвоямон ҷамъ омада, ба суханҳояш гӯш дода, мамлакатамонро боз ҳам ободу зебо гардонида, аз бадбинону бадхоҳони дохилию хориҷӣ ҳифз намоянд. Дар он сурат қарзи фарзандию инсониямонро иҷро менамоем.