Дар Хуҷанд Ярмаркаи байналхалқии савдо Суғд — 2016 доир мегардад

Душанбе, 24.05.2016 /АМИТ Ховар/. 17-18 июни соли 2016  дар шаҳри Хуҷанди вилояти Суғд Ярмаркаи байналхалқии савдо Суғд-2016 баргузор мешавад.  Дар чаҳорчӯбаи ярмарка Форуми озуқаворӣ ва Форуми таҳвили технологияҳо доир мешавад, ки дар онҳо намояндагони ширкатҳо, мақомоти ҳокимияти давлатӣ, воситаҳои ахбори омма ва созмонҳои байналмилалӣ ширкат меварзанд.
Ярмаркаи савдо Суғд-2016 аллакай чун анъана гашта, ҳар сол барои истеҳсолкунандагон ва сохторҳои соҳибкории вилоят ва дигар минтақаҳои Тоҷикистон ба яке аз рӯйдодҳои муҳими сол табдил меёбад.
Ташкилкунандагони ярмарка  Мақомоти иҷроияи ҳокимияти давлатии вилояти Суғд, Палатаи савдо ва саноати вилояти Суғд ва шарикони рушд мебошанд.
Мақсади ташкили ярмаркаи байналхалқии савдо — мустаҳкам намудани тиҷорати дарозмуддат ва робитаҳои ҳамкорӣ байни ҷомеаи соҳибкории вилояти Суғд ва дигар минтақаҳои Тоҷикистон бо ширкатҳои тиҷоратӣ, муштариёни эҳтимолӣ, сармоягузорон ва доираҳои соҳибкории кишварҳои хориҷӣ тавассути таъмини замина барои нишон додани қобилият ва имконоти иқтисоди вилояти Суғд ва таҷрибаи пешқадами кишварҳои дуру наздики хориҷӣ мебошад.
Таваҷҷуҳи худро барои иштирок дар Ярмаркаи  байналхалқии савдо Суғд-2016 на танҳо корхонаву ширкатҳо аз минтақаҳои Тоҷикистон, балки ҷомеаи соҳибкорӣ дар Қазоқистон, Русия, Қирғизистон, Беларус, Словакия, Чин ва кишварҳои дигар изҳор намуданд.
Дар ярмарка инчунин намояндагони корхонаҳои саноати сабук ва бофандагӣ, истеҳсоли маҳсулоти сохтмон, намояндагони ширкатҳои тиҷоратӣ, бонкҳо, молиявӣ, машваратӣ, лизинг, нақлиёт ва логистика ва сохторҳои дигар ширкат хоҳанд варзид. Бори нахуст ярмаркаи алоҳидаи ҳунарҳои мардумӣ, ки дар солҳои охир такони нав дар рушди худ пайдо намудааст  ва ярмаркаи алоҳидаи ширкатҳои сайёҳӣ  баргузор мегардад.