Дар натиҷаи омадани сел модару писар ҳалок гаштанд

Душанбе, 10.05.2016. /АМИТ «Ховар»/. Кумитаи ҳолатҳои фавқулода ва мудофиаи граждании назди Ҳукумати ҶТ иттилоъ медиҳад, ки шабонарӯзи охир боронҳои шадид ва фаромадани сел ба баъзе минтақаҳои кишвар хисороти ҷониву моддӣ расониданд.
9 май дар натиҷаи боронҳои зиёд дар деҳаи Ревади ҷамоати Урметани ноҳияи Айнии вилояти Суғд сел фаромада, сокини 41 солаи деҳа ва писари 17- солаи вай ҳалок гаштанд.
Бино ба маълумоти кумита ҳангоми рух додани ҳодиса модару писар дар болои кӯҳ чорвои худро мечаронидаанд.
Дар натиҷаи боришот чорводорони маҳаллӣ низ зарар дидаанд.
Наҷотдиҳандагони Ситоди КҲФ ва МГ дар вилояти Сугд дар ҷараёни корҳои кофтуковию наҷотдиҳӣ ҷасади ҷавони ҳалокгашта ва модарашро дарёфт намуданд.
Худи ҳамон рӯз дар деҳаҳои Шӯрча ва Кӯктоши ҷамоати Халифа Ҳасани ноҳияи Панҷакент дар натиҷаи боридани борони сел ярч фаромада, як қатор манзилҳои истиқомативу корхонаҳо, 2 км роҳи мошингард, 2 кӯпрук ва 60 гектар заминҳои киштро хароб сохт.
Дар айни замон барои расонидани кумак ба аҳолӣ ба ноҳия роҳбарони КҲФ ва МГ омада, Комиссия оид ба барҳам додани оқибатҳои ҳолати фавқулода таъсис ва ситодҳо ташкил шудаанд.
Масъалаи расонидани кумаки зарурӣ ба аҳолии зарардида баррасӣ мешавад.
КҲФ аз сокинони кишвар даъват ба амал меорад, ки зимни гузаштан аз ноҳияҳое, ки фаромадани ярчу санг имкон дорад, ҳушёр бошанд.