ДДҲБСТ: Тағйиру иловаҳо ба Конститутсияро тарафдорем!

Хуҷанд, 16.05.2016 /АМИТ Ховар/. Дар Донишгоҳи давлатии ҳуқуқ, бизнес ва сиёсати Тоҷикистон вохӯрӣ бо намояндагони Раёсати Вазорати корҳои дохилӣ дар вилояти Суғд, Раёсати адлияи вилояти Суғд ва Комиссияи марказии интихобот ва раъйпурсии Ҷумҳурии Тоҷикистон бо иштироки васеи устодону донишҷӯён баргузор гардид.
Ректори Донишгоҳ Ҷамшед Ҷӯрабоев ворид намудани тағйиру иловаҳо ба Конститутсияи Ҷумҳурии Тоҷикистонро, пеш аз ҳама, барои рушди босуботи ҷомеаи муосир, такмили равандҳои демократикунонии ҳаёти ҷомеа, ҳуқуқу озодиҳои инсон ва кафолати риояи он, таҳким бахшидан ба асосҳои конститутсионии ҳокимияти давлатӣ, рушди забони давлатӣ ва мутобиқ намудани меъёрҳои Конститутсия бо истилоҳу меъёрҳои санадҳои байналмилалӣ маънидод намуд.
Дар мулоқот зикр гардид, ки ворид намудани тағйиру иловаҳо ба Конститутсия амри замон буда, дар густариши равандҳои демократӣ, пешрафти иқтисодиву иҷтимоӣ ва фарҳангиву маънавӣ, тарғибу ҳифзи арзишҳои миллӣ нақши муассир дорад. Инчунин дар мулоқот пешгирии шомилшавии ҷавонон ба ҳизбу ҳаракатҳои ифротӣ мавриди баррасӣ қарор гирифта, таъкид гардид, ки ҷавонон бояд дар роҳи тарғиби арзишҳои миллӣ, худшиносиву худогоҳӣ ва ватандӯстиву меҳанпарастӣ ҳамеша омода ва ташаббускор бошанд.
Ҳадафи чунин мулоқоту вохӯриҳо баланд бардоштани донишҳои ҳуқуқию сиёсии ҷомеа, махсусан ҷавонон, дар сатҳи баланди сиёсӣ ва шаффоф баргузор гардидани раъйпурсии умумихалқӣ мебошад.