Фестивал оид ба навъҳои варзиши ҳарбӣ-амалӣ

Душанбе, 26.05.2016 /АМИТ «Ховар»/. Бо ташаббуси Вазорати илм ва маорифи Ҷумҳурии Тоҷикистон дар доираи фестивали истеъдодҳо ва ҳунарҳои муассисаҳои таҳсилоти миёнаи касбӣ, мусобиқот аз рӯи даҳ намуди варзиш баргузор гардид.Дар доираи ин фестивал хонандагони коллеҷҳои тарбияи ҷисмонӣ, коллеҷи техникӣ, коллеҷи ташкилоти Ҷамъияти мададгори мудофиа ва коллеҷи ҳарбии Вазорати корҳои дохилии Ҷумҳурии Тоҷикистон иштирок доштанд.
Мусобиқаи мазкур ба 25 солагии истиқлолияти давлатӣ бахшида шуда буд ва дар майдони варзишии Ташкилоти ҷамъияти мададгори мудофиаи Ҷумҳурии Тоҷикистон доир шуд.
Иштирокдорон аз намудҳои гӯштини миллӣ, партофтани норинҷак, давидан, ҷудо ва ҷамъ кардани автомат, бандкашӣ, вазнбардорӣ ва эстафета нерусанҷӣ намуданд, ки хеле шавқовару диданӣ буд.
Дар анҷоми мусобиқа беҳтаринҳо миёни писарону духтарон муайян гардиданд.