Истиқлолияти давлатӣ: дастовардҳо ва пешравиҳои он

Душанбе, 28.05.2016. /АМИТ «Ховар»/. Бахшида  ба 25-солагии Истиқлолияти давлатии Ҷумҳурии Тоҷикистон бо ибтикори Вазорати маориф ва илми Ҷумҳурии Тоҷикистон дар Донишкадаи ҷумҳуриявии такмили ихтисос ва бозомўзии кормандони соҳаи маориф бо иштироки устодону муҳаққиқони ҷавони муассисаҳои таҳсилоти олии касбӣ конфронси илмӣ-назариявии ҷумҳуриявӣ дар мавзўи «Истиқлолияти давлатӣ: дастовардҳо ва пешравиҳо» доир гардид.
Дар конфронс муовини аввали вазири маориф ва илм Раҳматулло Мирбобоев гуфт, ки: «Бо мақсади пешрафт ва такони ҷиддӣ бахшидан ба рушду такомули илму маориф, техника ва технологияи навин, беҳтар гардонидани вазъи иҷтимоии кормандони соҳаи маориф ва тарбияи насли нави муҳаққиқони соҳаи техника дар кишвар Ҳукумати Ҷумҳурии Тоҷикистон дар солҳои Истиқлолияти давлатӣ соли 2010-ро «Соли маориф ва фарҳанги техникӣ» эълон кард, ки он барои фароҳам овардани заминаи рушду такомули тафаккури техникиву технологӣ дар муассисаҳои таълимии зинаҳои гуногун ва пажўҳишгоҳҳои илмӣ мусоидат намуд».
Конфронс  дар ду бахш зери унвонҳои «Истиқлолияти давлатӣ: дастовардҳо ва пешравиҳо дар сиёсат, иқтисодиёт ва ҳуқуқ» ва «Истиқлолияти давлатӣ: дастовардҳо ва пешравиҳо дар соҳаҳои иҷтимоӣ ва фарҳанг» кори худро идома бахшид. Дар бахшҳо беш аз 30 мавзўъ мавриди баррасӣ қарор гирифт.