ММТ: Аз 20 то 30 июн даври дуюми бақайдгирии довталабон муайян шудааст

Душанбе, 5.05.2016 /АМИТ «Ховар»/. 30 апрели соли равон даври аввали бақайдгирии довталабон дар Маркази миллии тестии назди Президенти Ҷумҳурии Тоҷикистон ба анҷом расид.
Тавре Абдувосид Юлдошев, ёвари директори Маркази миллии тестӣ ба хабарнигори АМИТ «Ховар» иттилоъ дод, мувофиқи маълумоти омории пешакӣ шумораи довталабоне, ки барои иштирок дар имтиҳонҳои марказонидаи дохилшавӣ аз қайд гузаштаанд, ҳудуди 83 ҳазор нафарро ташкил медиҳад, ки ин шумора нисбат ба довталабони соли 2015 қариб 10 ҳазор нафар зиёд мебошад.
Даври дуюми бақайдгирии иловагӣ аз 20 то 30-юми июн ба нақша гирифта шуда, дар он довталабоне иштирок карда метавонанд, ки бо сабабҳои гуногун натавонистанд дар даври аввал аз қайд гузаранд.
Тибқи иттилои Абдувосид Юлдошев, нафароне, ки хизмати ҳарбиро дар сафи Қувваҳои мусаллаҳи Ҷумҳурии Тоҷикистон адо намудаанд, метавонанд ба гурӯҳи имтиёздорон шомил шаванд.
Ҳамчунин ғолибони олимпиадаҳои ҷумҳуриявӣ, ки бо ишғол намудани ҷойҳои 1, 2 ва 3 аз 90 то 100 холро ба даст овардаанд, бо гирифтани роҳхат аз тарафи Вазорати маориф ва илми Ҷумҳурии Тоҷикистон ба ин ё он донишгоҳ дохил мешаванд.