Моҳияти раъйпурсии умумихалқӣ

Душанбе, 02.05.2016 /АМИТ «Ховар»/. Дар Донишкадаи молия ва иқтисоди Тоҷикистон вохӯрии намояндагони Вазорати маориф ва илми ҶТ, Вазорати корҳои дохилии ҶТ, Вазорати адлияи ҶТ, Комиссияи марказӣ оид ба интихобот ва раъйпурсии ҶТ, Донишгоҳи давлатии омӯзгории Тоҷикистон ба номи С.Айнӣ бо аҳли омӯзгорону донишҷӯёни ДМИТ доир гардид.
Тавре ки котиби матбуоти донишкада Машҳура Абдуллоева хабар дод, дар вохӯрӣ перомуни аҳамият, моҳият ва зарурати тағйиру иловаҳо ба Конститутсияи (Сарқонуни) кишвар сухан гуфта, зикр намуданд, ки дар ҷараёни инкишофи муносибатҳои ҷамъиятӣ ва давлатдории мустақил таҷрибаи кофии ташкили низоми сиёсӣ, иҷтимоӣ ва иқтисодӣ андӯхта мешавад ва ҷомеаи шаҳрвандӣ дарк менамояд, ки заминаҳои ин низом бояд мукаммал гардонида шаванд. Чунин даркнамоӣ аз инкишофи ҷомеа дарак дода, худи инкишоф ба баланд бардоштани дарки масъулияти шаҳрвандӣ низ мусоидат менамояд. Бинобар ин пешравӣ, инкишоф, ноилшавӣ ба рушди устувор бо мукаммал гардонидани Конститутсия санади заминасози давлатдорӣ ва муайянкунандаи асосҳои рафтору муносибатҳо дар доираи ин давлатдорӣ мебошад.
Раъйпурсӣ барои ворид намудани тағйиру иловаҳо ба Конститутсия яке аз аломатҳои барҷастаи ҷомеаи демократӣ буда, ширкати фаъолонаи мардум дар ин маъракаи муҳим нишонаи иттиҳоду якдилии аҳли ҷомеа дониста мешавад.