Мубориза бар зидди маводи мухаддир ҷузъи ҳатмии мубориза бо терроризм ва экстремизм эълон гардид

Душанбе, 10.05.2016 /АМИТ «Ховар»/. Асосгузори сулҳу Ваҳдати миллӣ — Пешвои миллат муҳтарам Эмомалӣ Раҳмон имрӯз зимни нишасти матбуотӣ оид ба натиҷаҳои мулоқоту музокироти сатҳи олӣ миёни роҳбарони Тоҷикистону Афғонистон дар ҳузури хабарнигорони дохил ва хориҷи кишвар изҳор кард, ки: «Мубориза бар зидди муомилоти ғайриқонунии маводи мухаддир бояд чун ҷузъи ҳатмии мубориза бо неруҳои терроризм ва экстремизм шинохта шавад».
Сарвари давлат зарурати муборизаи қатъӣ ба муқобили муомилоти ғайриқонунии маводи мухаддирро таъкид намуда, гуфт: «Рӯйдодҳои охир дар минтақаҳои мухталифи ҷаҳон нишон медиҳанд, ки терроризм, экстремизм ва кочоқи маводи мухаддир ба хатарҳои азимтарини олами муосир табдил ёфтаанд. Майдони фаъолияти даҳшатноку нафратовари терроризм торафт фарох гардида, қувват гирифтани он вазъиятро боз ҳам мураккабтар гардонидааст».
Хотиррасон бояд шуд, ки роҳбарияти олии Тоҷикистон борҳо изҳор кардааст, ки: «Яке аз манбаъҳои асосии маблағгузории терроризми байналмилалӣ даромад аз муомилоти ғайриқонунии маводи мухаддир мебошад».