Нақшаи даъвати баҳории шаҳрвандон ба хизмати ҳарбӣ 80 фоиз иҷро шуд

Душанбе, 05.05.2016. /АМИТ «Ховар»/. Дар давоми беш аз як моҳи ҷараёни маъракаи муҳими сиёсӣ, яъне даъвати навбатии шаҳрвандон ба хизмати ҳарбӣ иҷрои нақша дар қаламрави ҷумҳурӣ 80 фоизро ташкил дод.
То имрӯз 20 шаҳру навоҳии мамлакат нақшаи пешбинишударо пурра ба анҷом расониданд. Дар миёни гарнизонҳои ҷумҳурӣ шаҳру ноҳияҳои вилояти Хатлон нисбат ба дигар минтақаҳо пешсаф буда, иҷрои нақша дар ин вилоят ба 94 фоиз баробар мебошад. Ин нишондод дар Вилояти Мухтори Кӯҳистони Бадахшон 87 фоизро ташкил дода, масъулини даъват азм доранд, ки рӯзҳои наздик ин маъракаи муҳими сиёсиро пеш аз муҳлат ба анҷом расонанд.
Тавре ки аз хадамоти мабуоти Вазорати мудофиаи кишвар хабар доданд, дар давоми беш аз як моҳи ҷараёни ин маъракаи муҳими сиёсӣ, иҷрои нақшаи даъвати шаҳрвандон ба хизмати ҳатмии ҳарбӣ дар вилояти Суғд 75 фоиз, ноҳияҳои тобеи ҷумҳурӣ 73 фоиз ва дар чаҳор навоҳии пойтахт ба 54 фоиз баробар шуд.
Тавре қаблан иттилоъ дода будем, дар асоси Фармони Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1989-1998 Ҷумҳурии Тоҷикистон ба хизмати ҳарбӣ» ва тибқи талаботи Қонуни Ҷумҳурии Тоҷикистон Дар бораи уҳдадории умумии ҳарбӣ ва хизмати ҳарбӣ аз 1-уми апрели соли 2016 дар ҳама шаҳру навоҳии мамлакат даъвати баҳории шаҳрвандон ба хизмати ҳатмии ҳарбӣ муташаккилона идома дорад.
Фаъолияти мақомоти масъули давлатии даъват дар ҳама шаҳру навоҳии мамлакат то 31-уми майи соли 2016 идома меёбад.