Ноболиғ 4 сол аз озодӣ маҳрум шуд

Душанбе, 11.05.2016 /АМИТ «Ховар»/. Суди ноҳияи Исмоили Сомонии шаҳри Душанбе парвандаи ҷиноятӣ нисбат ба ноболиғ МУ-ро бо моддаи 249 қисми 3 банди а-и КҶ Ҷумҳурии Тоҷикистон баррасӣ намуда, ба ӯ ҷазо дар намуди маҳрум сохтан аз озодӣ ба муҳлати 4 (чор) сол, бо адо намудан дар муассисаҳои тарбиявии дорои низоми умумӣ таъйин кард.
Ин ноболиғ бо маслиҳати пешакӣ бо Н. И., 30 октябри соли 2015, тахминан соати 22:00, дари даромадгоҳи ҳуҷраи муваққатан истиқоматии шаҳрванди Ҷумҳурии Туркия Мехмет Юлмаз Ҳусейн, суроғааш кўчаи М. Турсунзода-13/23 ҳуҷраи 5-ро кушода монда, бо телефони мобилиаш ба И. Нусратзода барои амалӣ намудани кирдори ҷинояткоронаашон занг зада, хабар мерасонад, ки Н. И. вориди хона гардад.
Сипас, Н. И. бо корди дар даст доштааш вориди хонаи мазкур гашта, ба ҷониби Мехмет Юлмаз ҳамла менамояд. Номбурдаро лату кӯб намуда, ба замин меафтонад ва бо корд ба қисмати рони пойи чапаш мезанад, ки дар натиҷа ӯ аз ҳуш меравад.
Н. И. ҳамроҳи ноболиғ Умия Маматқулова ҳуҷраи мазкурро кофтуков намуда, 7100 доллари ИМА ва телефони мобилии тамғаи «Нокия»-ро, ки арзишаш 350 сомонӣ аст, тасарруф намуда, аз ҷойи ҳодиса ғайб мезананд.