Омодагӣ ба таҷлили 25-солагии истиқлолият дар ноҳияи Фирдавсии шаҳри Душанбе назаррас аст

Дар ноҳияи Фирдавсии шаҳри Душанбе барои омодагӣ ба таҷлили 25-солагии Истиқлолияти давлатии Ҷумҳурии Тоҷикистон нақшаи чорабиниҳо таҳия ва тасдиқ гардида, корҳои созандагию ободкорӣ ҷараён доранд.
Дар ноҳия корҳои ободониву сабзазоркунӣ, ниҳолшинонӣ, ба тартиб даровардани кӯчаву роҳравҳо ва ҳашарҳои умумишаҳриву ноҳиявӣ хуб ба роҳ монда шудаанд. Аз ҷумла, таъмири ҷории роҳҳо, пур кардани тарқишҳои роҳҳо бо мум ва қум, тоза намудани ҷӯйборҳои обгузар, шинонидани гули лола ва дигар корҳо ба ҷо оварда шуда, иқдоми мазкур то ҷашни 25- солагии Истиқлолияти давлатии Ҷумҳурии Тоҷикистон идома дода мешавад.
Тавре мудири шуъбаи рушди иҷтимоӣ ва робита бо ҷомеаи дастгоҳи раиси ноҳияи Фирдавсии шаҳри Душанбе Муҳаммадрасул Файзуллозода зикр кард: « Бо мақсади инъикоси табиати зебои диёр, таъриху тамаддун, расму оин, асолати худшиносии миллӣ ва дарёфти истеъдодҳои нав ба нав дар иншонависӣ, эҷодкорӣ ва луғатнигорӣ озмуни иншои беҳтарин дар мавзӯи «Ман тоҷикам!», «Ватани ман Тоҷикистон» ва озмуни рассомони ҷавон дар мавзӯи «Тоҷикистон- хонаи ободи ман!» ва чандин мавзӯъҳои дигар бахшида ба 25-солагии Истиқлолияти давлатии кишвар бо баргузории чорабиниҳои фарҳангию фароғатӣ ба таври васеъ баргузор карда шуданд ва чунин силсилачорабиниҳо то 25- солагии истиқлолият идома хоҳанд ёфт».