Ошкор гардидани 18 ҳазор диск бе ҳуҷҷати тасдиқкунандаи воридотӣ

Душанбе, 30.052016./АМИТ «Ховар»/. Зимни гузаронидани амалиёти гумрукӣ кормандони  Хадамоти гумруки кишвар дар ҳудуди бозори «Корвон»-и пойтахт  мошини тамғаи «Опел»-ро, ки ба шаҳрванд М.Ғ тааллуқ дошт, боздошт намуданд. Аз дохили мошини мазкур 30 ҳазор  диски истифоданашуда ошкор карда шуд. Маълум гардид, ки шаҳрванд М. Ғ ҳамчун ронандаи мошини  кироя молҳои шаҳрвандонро аз шимоли кишвар ба пойтахт меовардааст.
30 ҳазор диски истифоданашуда ба соҳибмулк Т.Ғ,  тааллуқ дошта, мавсуф танҳо барои 12 ҳазор адад диск ҳуҷҷати тасдиқкунандаи воридотӣ пешниҳод карда тавонист. Соҳибмулк Т.Ғ иброз намуд, ки дискҳоро ҳангоми ба фаъолияти соҳибкорӣ машғул будан ба даст овардааст ва ба мақомоти  гумрук барои ихтиёран ба расмияти гумрукӣ даровардан бо аризаи расмӣ муроҷиат  намуд. Дафтари  матбуоти Хадамоти  гумруки кишвар иттилоъ медиҳад, ки тибқи моддаи 435-и Кодекси гумруки Ҷумҳурии Тоҷикистон  моли боздоштшуда ба расмияти гумрукӣ дароварда шуд.