Пешгирии ҷавонон аз нашъамандӣ ва шомилшавӣ ба гурӯҳҳои террористӣ

Душанбе, 26.05.16. /АМИТ «Ховар»/. «Масъалаҳои пешгирии шомилшавии ҷавонон ба ҳизбу ҳаракатҳои ифротгаро, зарар ва оқибатҳои истеъмоли маводи нашъаовар»- таҳти чунин мавзӯъ дар   Донишгоҳи давлатии забонҳои Тоҷикистон  аз тарафи кормандони Агентии назорати маводи нашъаовари назди Президенти ҶТ чорабинии зиддимухаддиротӣ гузаронида шуд.
Дар вохӯрӣ намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон , Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон низ иштирок намуданд.
Тавре ки ба АМИТ «Ховар» аз маркази матбуоти агентии мазкур хабар доданд, чорабинӣ  бо мақсади пешгирии нашъамандӣ гузаронида шуда, дар он мутахассисони АНМН оид ба масъалаҳои мубрами рӯз — пешгирии наврасону ҷавонон аз истеъмол ва хариду фурӯши маводи нашъадор, инчунин шомилшавӣ ба гурӯҳҳои террористӣ, экстремистӣ, ифротгароӣ, ҳизбу ҳаракатҳои тундрав, ҷинояткориву ҳуқуқвайронкунӣ, инчунин оқибатҳои ҳуқуқию иҷтимоӣ ва тиббии суиистеъмоли маводи нашъадор маълумот доданд.