Раванди ҷаҳонишавии технологияҳои иттилоотӣ дар фаъолияти китобхонаҳои ҷумҳурӣ

Душанбе,03.05.2016 /АМИТ «Ховар»/. Китобхонаи давлатии патентию техникии Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон 5 ва 6 майи соли равон дар Муассиса дар мавзӯи «Раванди ҷаҳонишавии технологияҳои иттилоотӣ дар фаъолияти китобхонаҳои Ҷумҳурии Тоҷикистон» бо иштироки роҳбарон ва мутахассисони китобхонаҳои Ҷумҳурии Тоҷикистон Конфронси илмию амалии ҷумҳуриявӣ баргузор менамояд.
Мақсади асосии Конфронси мазкур муайяну мушаххас намудани муаммоҳои ҷойдошта дар раванди ҷаҳонишавии технологияҳои иттилоотӣ дар фаъолияти китобхонаҳои Ҷумҳурии Тоҷикистон, масоили дурнамои рушди китобхонаҳо дар самти ҷамъоварӣ, коркарди илмӣ, гурӯҳбандӣ, мавриди омӯзишу тарғиб қарор додани манобеи электронӣ, ташкили маъхазҳои электронӣ бо истифода аз фондҳои чопӣ, марказҳои иттилоотӣ, таъмини дастёбии хонандагон ба сарчашмаҳои пурраматни интернетӣ ва таъмини талабу дархости ҷомеа ба адабиёти мавриди ниёзи хониш мебошад.
Дар назар аст, ки дар гузоришҳои кормандони китобхонаҳои миллӣ ҷумҳуриявӣ, вилоятӣ, шаҳрӣ, ноҳиявӣ ва донишгоҳӣ роҷеъ ба масоили вазъи кунунии хизматрасонӣ бо назардошти воридшавии технологияи нави иттилоотӣ дар фаъолияти китобхонаҳо таваҷҷуҳи хосса зоҳир карда шуда, андешаҳои ҷолиб перомуни мувофиқу мутобиқ намудани самтҳои афзалиятноки фаъолияти китобхонаҳо ба тақозои даврони истиқлол ва вижагиҳои ҷомеаи иттилоотӣ мавриди баррасӣ қарор хоҳад гирифт.
Ин чорумин Конфронси соҳаи китобдорӣ аст, ки аз ҷониби Китобхонаи давлатии патентию техникӣ гузаронида мешавад.