«Сабабу омилҳои шомилшавии ҷавонон ба ҳизбу ҳаракатҳои ифротӣ» — cуҳбати созанда дар Кӯлоб

Душанбе, 06.05.2016./АМИТ«Ховар»/. Дар шаҳри Кӯлоб бо ташаббуси Дастгоҳи иҷроияи Президенти Ҷумҳурии Тоҷикистон ва Кумитаи дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон бо иштироки масъулини зинаҳои гуногуни соҳа ва имомхатибони шаҳру навоҳии минтақа дар мавзӯи «Сабабу омилҳои шомилшавии ҷавонон ба ҳизбу ҳаракатҳои ифротӣ» суҳбати «мизи мудаввар» барпо гардид.
Сулаймон Давлатзода, раиси Кумитаи дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон дар мавзӯи «Заминаҳои рушди ифротгароӣ ва роҳҳои пешгирии он», Искандар Солеҳзода, муовини вазири корҳои дохилии Ҷумҳурии Тоҷикистон дар бораи «Иштироки ҷавонон дар ҷангҳои Сурия ва тақдири онҳо», Саидмукаррам Абдуқодирзода, раиси Маркази исломии Ҷумҳурии Тоҷикистон дар хусуси «Хатарҳои фаъолияти ҳизбу ҳаракатҳои ифротӣ», З.Саидзода, корманди Академияи Вазорати корҳои дохилии Ҷумҳурии Тоҷикистон оид ба «Сабабҳои шомилшавии ҷавонон ба гурӯҳҳои ифротӣ», Шералӣ Ризоён, сардори Раёсати таҳлил ва ояндабинии дохилии Маркази тадқиқоти стратегии назди Президенти Ҷумҳурии Тоҷикистон дар боби «Таъсири шабакаҳои моҳвораӣ ва интернетӣ дар гароиши ҷавонон ба ҳизбу ҳаракатҳои ифротӣ ва роҳҳои пешгирии он» ва Нусратулло Зокиров, сардори шуъбаи пажӯҳиши ҳуқуқи исломии Маркази исломшиносии назди Президенти Ҷумҳурии Тоҷикистон дар мавзӯи «Ифротгароӣ ва таъсири он ба тафаккури динӣ» сухан гуфтанд.
Байни иштирокдорони «мизи мудаввар» оид ба масъалаҳои баррасишуда, ки мушкилоти рӯз маҳсуб мешаванд, мубодилаи афкор ба миён омад.
Сипас, як зумра имомхатибон дар атрофи мавзӯъҳои зикршуда сухан гуфта, оид ба роҳҳои пешгирӣ намудани ҷавонон аз шомилшавӣ ба гурӯҳҳои тундраву ифротӣ ёдрас шуда, аз ҷумла зикр намуданд, ки баргузории чунин вохӯриҳо дар тамоми минтақаҳои ҷумҳурӣ манфиатбахш мебошад.