Савганди ҳарбии беш аз 300 нафар бахшида ба 22-юмин солгарди қӯшунҳои сарҳадӣ

Душанбе, 27.05.2016. /АМИТ «Ховар»/. Бахшида  ба 22-юмин солгарди таъсиси қӯшунҳои сарҳадии КДАМ ҶТ 27 май дар маркази таълимии «Пойтахт»-и Қӯшунҳои сарҳадии КДАМ ҶТ беш аз 300 нафар сарбозони навдаъватшуда Савганди ҳарбӣ ёд карданд.
Дар ин чорабинии тантанавӣ муовини якуми Фармондеҳ-сардори Сарситоди  қӯшунҳои сарҳадии КДАМ ҶТ полковник Изатулло Файзуллоев, муовини Фармондеҳ оид ба корҳои сиёсӣ-тарбиявӣ полковник Бадридин Мирзоев,  сардори маркази таълимии «Пойтахт»-и қӯшунҳои сарҳадӣ генерал-майор Б.Муминҷонзода, намояндагони сарҳадии Федератсия Русия дар Тоҷикистон, собиқадорони қӯшунҳои сарҳадӣ, падарону модарони сарбозон ва дигар меҳмонон иштирок доштанд.
Муовини Фармондеҳ-сардори Сарситоди қӯшунҳои сарҳадии КДАМ ҶТ полковник Изатулло Файзуллоев зикр кард, ки маҳз бо шарофати садоқату ҷасорати касбӣ, фидокориву ҷоннисорӣ ва хизматҳои шабонарӯзӣ имрӯз дар ҷомеаи мо сулҳу субот пойдор гардида, мардум зиндагии осоишта доранд.
«Бояд  зикр  кард, ки мубориза  бар зидди  ҳама гуна хатарҳои эҳтимолӣ бахусус терроризми байналмилалӣ, экстремизми сиёсӣ ва дигар зуҳуроти номатлуб аз ҳар як афсару сарбоз омодабошии доимии ҳарбиро тақозо менамояд, зеро ҳифзи дастовардҳои истиқлолияти давлатӣ ба  ҳар як фарди содиқ ва бонангу номуси ин Ватан вобастагӣ дорад.  Вазифаи аввалиндараҷаи ҳар як хизматчии ҳарбӣ- ин садоқат ба Ватан ва Савганди ҳарбӣ мебошад»,-илова намуд И. Файзуллоев.
Дар анҷоми маросими тантанавӣ ба афсарону сарбозон  барои ба натиҷаҳои назаррас расидан аз номи Фармондеҳи қӯшунҳои сарҳадии КДАМ ҶТ ифтихорномаҳо, нишонҳои сарисинагӣ ва медалҳои ҷашнӣ тақдим гардиданд.