«Шоҳнома» ва «Тоҷикон дар оинаи таърих»- китобҳои рӯимизии афсарон

Кӯлоб, 25.05.2016 /АМИТ «Ховар»/. 24 май бо ташаббуси Кумитаи иҷроияи Ҳизби Халқии Демократии Тоҷикистон  дар шаҳри Кӯлоб ва ТҶҶ «Созандагони Ватан» дар қисми низомии 13483 «Д»-и шаҳри Кӯлоб таҳти унвони «Китоби «Шоҳнома»-и Фирдавсӣ ва китоби «Тоҷикон дар ойинаи таърих»-и Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро мехонем!» ҳамоиши ватандӯстонаи ҳизбӣ баргузор шуд.
Ҳамоиши мазкур дар доираи «25 ҳафтаи «Созандагони Ватан»» доир гардида, ба 25-солагии Истиқлолияти давлатии Ҷумҳурии Тоҷикистон бахшида шуд.
Дар ҳамоиш иштирокдорон бо ҳайати фармондеҳӣ ва афсарону сарбозони қисми низомии 13483 «Д»-и шаҳри Кӯлоб раиси Кумитаи иҷроияи ҲХДТ дар шаҳри Кӯлоб бо иқтибос аз шоҳасарҳои миллат  «Шоҳнома» ва «Тоҷикон дар оинаи таърих»  перомуни миллатдӯстиву ватанпарварӣ ва ифтихор аз гузаштаву имрӯзаи давлатдории миллатамон суханронӣ намуданд.
Аз тарафи ихтиёриёни ТҶҶ «Созандагони Ватан» ба иштирокдорон порчаҳои назмиву насрӣ хонда шуда, саҳнаҳои ибратомӯзи ватанпарварона манзур карда шуд.
Командири қисми низомӣ, подполковник Илҳом Сайвалиев изҳор дошт, ки баргузории чунин чорабиниҳо афсарону сарбозонро беш аз пеш рӯҳбаланд гардонида, дар баланд гардидани сатҳи маънавиёт ва эҳсоси ватандӯстиашон мусоидат менамояд.  «Шоҳнома» ва «Тоҷикон дар оинаи таърих» китобҳои рӯимизии афсарон буда, онҳо аз ин асарҳо дарси хештаншиносӣ меомӯзанд.