«Шоми Ваҳдат»: аз Хатлон то Бадахшон

Қурғонтеппа, 31.05.2016 /АМИТ Ховар/.  Дар  доираи Рӯзҳои фарҳангии  вилояти  Хатлон дар  Бадахшон раиси вилояти Хатлон Давлатшоҳ Гулмаҳмадзода ҷиҳати иштирок дар чорабиниҳои фарҳангӣ ва дидори собиқадорон ба вилояти Мухтори Кӯҳистони Бадахшон сафар кард.
Тавре аз шуъбаи иттилоотӣ-таҳлилии  мақомоти иҷроияи ҳокимияти давлатии вилояти Хатлон иттилоъ доданд,  раиси  вилояти Хатлон Давлатшоҳ Гулмаҳмадзода ва  раиси ВМКБ Шодихон Ҷамшед аз се хонаводаи собиқадорони меҳнат дар шаҳри Хоруғ дидан намуда, Д. Гулмаҳмадзода туҳфаҳои фиристодаи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба собиқадорон расонид.
Инчунин раисони вилоятҳо аз гарнизони қисми ҳарбии шаҳри Хоруғ дидан намуда, дар маросими савгандёдкунии наваскарон иштирок намуданд.
Дар боғи фарҳангию фароғатии шаҳри Хоруғ раиси вилояти Хатлон Давлатшоҳ Гулмаҳмадзода ва раиси вилояти Мухтори Куҳистони Бадахшон Ҷамшед Шодихон бо ҳайати расмӣ аз намоишгоҳи маҳсули ҳунарҳои мардумӣ ва маҳсулоти кишоварзию саноатӣ дидан намуда, дар пояи муҷассамаи Қаҳрамони Тоҷикистон-Шириншоҳ Шоҳтемур гулчанбар гузоштанд.
Раисони вилоятҳо баъд аз гулгузорӣ бо  250 нафар собиқадорони ҷангу меҳнати шаҳру ноҳияҳои ВМКБ суҳбат  оростанд.
Ҳамчунин дар  Хоруғ Барномаи фарҳангии ҳунармандони вилояти Хатлон таҳти унвони «Шоми Ваҳдат» доир гардид.