Тараннуми ватандӯстию ваҳдатпарастӣ дар Новокузнетск

Душанбе, 28.05.2016 /АМИТ «Ховар»/. Бо ибтикори ҷамъияти тоҷикони шаҳри Новокузнетск бо номи «Дӯстии тоҷикистониёну русҳо» дар шаҳри Новокузнетски Федератсияи Русия маҳфили шеъру суруд бо иштироки шоири ҷавону умедбахш, мудири бахши фарҳанги ҷамъияти тоҷикон  Дилшоди Рамазонзода ва дастаи ҳунарию этнографии назди ҷамъият   баргузор гардид.
Бояд зикр кард, ки  Дилшоди Рамазонзода  бо шеърҳое, ки дар васфи ватану ободиҳои он,  сулҳу дӯстӣ ва муҳаббат ба  Ватану муқаддасоти он бахшида шудаанд, дар миёни ҳамватанон маҳбубияти хос дорад.
Дар чорабинӣ ҳамватанони зиёде аз ҷамъиятҳои тоҷикон ва хонаи «Дӯстии халқҳо»-и шаҳр ширкат карда, зикр карданд, ки чунин маҳфилҳо аз тамаддуни пешрафтаву осори гаронбаҳои адабии мардуми тоҷик дарак дода, инсонҳоро ба сулҳу дӯстӣ ва ободкориву зебоипарастӣ ҳидоят мекунанд.
Маҳфилро таронаҳои дилошӯби дастаи ҳунарии «Нур», ки аз матни шеърҳои  Дилшоди Рамазонзода гирифта шудаанд ва шеърхонии шоири ҷавон рангинтар карданд.

Садбарг Боқиева,  Новокузнетск.