Ҳунармандони хатлонӣ ба Бадахшон мераванд

Душанбе, 12.05.2016. /АМИТ «Ховар»/. Аз 25 май то 1 июни соли равон баргузории Рӯзҳои фарҳанги вилояти Хатлон дар Вилояти Мухтори Кӯҳистони Бадахшон дар назар дошта шудааст ва ба ин хотир аҳли ҳунари вилоят ба ин сафар омодагии ҳамаҷониба мебинанд.
Тавре ки Бурҳониддин Раҷабов, сардори Раёсати фарҳанги мақомоти иҷроияи ҳокимияти давлатии вилояти Хатлон иттилоъ дод, дар ин сафар ҳунармандони Театри вилоятии мусиқӣ-мазҳакавии ба номи Ато Муҳаммадҷонови шаҳри Қурғонтеппа, Театри вилоятии мусиқӣ-мазҳакавии ба номи Саидалӣ Вализодаи шаҳри Кӯлоб бо барномаҳои пурмазмуни фарҳангӣ, ҳамчунин Маҳмадалӣ Аюбов, Ҳунарпешаи шоистаи Тоҷикистон, Аловиддин Абдуллоев, Ҳунарпешаи халқии Тоҷикистон ва чанде дигарон бо барномаҳои рангини ҳаҷвӣ табъи тамошобинони бадахшониро дар арафаи таҷлили Рӯзи Ваҳдати миллӣ болида хоҳанд кард.