Ёде аз қаҳрамонию ҷонбозиҳои диловарони Ҷанги дуюми ҷаҳон

Душанбе,7.05.2016 /АМИТ «Ховар»/. Бахшида ба таҷлили 71-умин солгарди Рӯзи ғалаба дар Ҷанги дуюми ҷаҳон 6 май дар Академияи Вазорати корҳои дохилии ҶТ маҳфили фарҳангӣ баргузор шуд.

Сардори Академияи ВКД, полковники милитсия Файзали Шарифзода аз он рӯзҳои даҳшате, ки ба сари халқу миллатҳои Иттиҳоди Шӯравӣ омада буд, муборизаи беамон бо истилогарони фашистӣ ва қаҳрамонию шуҷоати абадмардони майдони набард ёдовар шуд. Зикр гардид, ки корнамоии фарзандони Ватан, аз он ҷумла диловарони тоҷик дарси далерию ибрат ба наслҳои оянда буда, ҷонфидоии онҳо ҳеҷ гоҳ аз хотираи неки мо фаромӯш нахоҳад гашт.

Дар мавзӯъҳои «Аҳамияти Рӯзи Ғалаба бар фашизм», «Қаҳрамонии фиристодагони Тоҷикистон дар солҳои Ҷанги дуюми ҷаҳонӣ, «Ман Ватанро беш аз ҳарвақта дорам дӯсттар» аз ҷониби омӯзгорону курсантони Академия маърӯзаҳо шунида шуд.

Дар идомаи маҳфили фарҳангӣ дар иҷрои ҳунармандони Театри давлатии академӣ-драмавии ба номи А.Лоҳутӣ аз рӯи асари Сафармуҳаммад Аюбӣ спектакли «Ориёӣ» пешкаши тамошобинон гардид. Аз ҷониби ҳунармандони шинохтаи ҷумҳурӣ дар васфи Ватану ватандӯстӣ, корнамоию қаҳрамониҳои диловарон сурудҳои дилнишин суруда шуд.