Ҳамкории мақомот бо ҷавонон мустаҳкам мегардад

Душанбе, 4.06.2016 /АМИТ «Ховар»/. Дирӯз дар Кумитаи ҷавонон, варзиш ва сайёҳӣ ҷаласаи якуми Шӯрои “Маҳфили ҷавонони дар хориҷи кишвар таҳсилдошта” доир гардид.

Дар он масъалаҳои тасдиқи Низомномаи Шӯрои маҳфили ҷавонони дар хориҷи кишвар таҳсилдошта, ном, шиор ва рамзи маҳфил, нақшаи фаъолияти маҳфил дар соли 2016, муайян намудани заминаҳои ҳуқуқии фаъолияти маҳфил, мушкилот ва дархосту пешниҳодоти ҷавонони дар хориҷи мамлакат таҳсилдошта баррасӣ шуданд.

Аҳтам Абдуллозода, раиси шӯро иброз дошт, ки ҳадаф аз таъсиси ин шӯро ҳамоҳангсозии фаъолияти вазорату идораҳои дахлдор баҳри дар амал татбиқ намудани Паёми Пешвои миллат, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва татбиқи босамари сиёсати давлатии ҷавонон, дар ин замина мусоидат дар ҳалли мушкилоти ҷавонони дар хориҷи кишвар таҳсилдошта мебошад.

«Ҷавонон ҳамчун давомдиҳандагони ҳадафҳои олии давлат бо дастгирии Ҳукумати Ҷумҳурии Тоҷикистон бо азму иродаи қавӣ, ба хотири пешрафти ояндаи Ватани маҳбубамон дар хориҷи кишвар пайи аз худ кардани илм ва техникаву технологияи муосир мебошанд. Айни ҳол беш аз 30 ҳазор нафар ҷавони соҳибистеъдоду лаёқатманди мо дар хориҷи мамлакат аз ҳисоби давлат таҳcил доранд”, — гуфт А. Абдуллозода.

Иқдоми мазкур имкон медиҳад, ки ҳамкории вазорату идораҳои давлатӣ бо ҷавонони дар хориҷи кишвар таҳсилдошта мустаҳкам гардида, заминаи муассирро дар таҳкими дӯстӣ, ҳамкорӣ, ҳамгироӣ ва ватанпарастии ҷавонон баҳри хизмати шоён ба давлату миллати хеш гузорад.

Ёдовар мешавем, ки бо мақсади дастгирии маънавию иҷтимоии ҷавонони дар хориҷи кишвар таҳсилдошта дар назди Кумитаи ҷавонон, варзиш ва сайёҳии назди Ҳукумати ҷумҳурӣ Шӯрои “Маҳфили ҷавонони дар хориҷи кишвар таҳсилдошта” таъсис ёфта, намояндагони Вазорати маориф ва илм, Вазорати корҳои хориҷӣ, Вазорати меҳнат, муҳоҷират ва шуғли аҳолӣ ва Кумитаи кор бо занон ва оила узви шӯро мебошанд.