Ҳамоиш оид ба омӯзиши китоби «Тоҷикон дар оинаи таърих» дар Ваҳдат

Ваҳдат, 24.06.2016 /АМИТ «Ховар»/. Дирӯз бо ибтикори Мақомоти иҷроияи ҳокимияти давлатии шаҳри Ваҳдат ва Кумитаи иҷроияи ҲХДТ дар шаҳри Ваҳдат бахшида ба ҷашни Ваҳдати миллӣ ва 25- солагии Истиқлолияти давлатии Ҷумҳурии Тоҷикистон дар толори кохи «Маърифат» ҳамоиш оид ба омӯзиши китоби Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон «Тоҷикон дар оинаи таърих» доир гардид., ки дар он  намояндагони ташкилоту идораҳо, фаъолон, шоирону нависандагон, кормандони ҳифзи ҳуқуқ ва вакилони Маҷлиси вакилони халқии шаҳр иштирок намуданд.
Муовини раиси шаҳр Фарзона Хоҷазода зикр намуд, ки ваҳдату оромии кишвар бо ҷонфидоиҳои Асосгузори сулҳу Ваҳдати миллӣ,  Пешвои миллат муҳтарам Эмомалӣ Раҳмон ба даст омадааст. Дар дунё миллату халқиятҳое ҳастанд, ки аз рӯи шумораи аҳолӣ ва қаламрави ҷуғрофиашон дар муқоиса бо миллати мо хеле афзалият доранд, вале садсолаҳо дар орзуи давлатдории мустақилона ва ваҳдату оромӣ мебошанд. Аз ин хотир мову шумо бояд ба қадри соҳибистиқлолӣ, Ваҳдати миллӣ ва давлату давлатдории миллӣ расем ва онро азизу муқаддас донем.
Раиси суди шаҳри Ваҳдат Камолзода Сайфиддин Исмон иброз намуд, ки маҳз тавассути Ваҳдати миллӣ имкон фароҳам гардид, ки дар кишварамон сулҳу осоиштагӣ барқарор гардида, мардум аз вартаи ноумедӣ ва нобасомониҳои рӯзгор раҳоӣ ёбанд ва хушбахтона, дар барқарор шудани сулҳу ваҳдат саҳми Асосгузори сулҳу Ваҳдати миллӣ, Пешвои миллат, Президенти Тоҷикистон муҳтарам Эмомалӣ Раҳмон калон аст.
Сарвари бузурги мо ваъдаи дар Иҷлосияи 16-уми Шӯрои Олии Тоҷикистон додаашро, ки гуфта буд: «Ман ба Шумо сулҳ меорам!», содиқона иҷро намуда, аз рӯзҳои нахустини Сарвари давлат интихоб шуданаш пайи сулҳу суботу осоиштагӣ гардид.