Қасри нав барои фарҳангчиёни Ёвон

Душанбе, 29.06.2016 /АМИТ «Ховар»/.   Имсол бо дастгирии мақомоти иҷроияи маҳаллии ҳокимияти давлатии ноҳияи Ёвон барои бозсозӣ ва азнавбарқароркунии қасри фарҳанги ноҳия, ки солҳои   тӯлонӣ рӯи таъмирро надида буд, аз ҳисоби буҷаи ноҳия як миллион сомонӣ маблағ ҷудо гардида, азхудкунии он давра ба давра амалӣ гардида истодааст.
Тавре  ки Аҳлиддин Қулов, мудири бахши фарҳанги мақомоти иҷроияи ҳокимияти давлатии ноҳияи зикр кард, айни замон дар иншооти мазкур корҳои таъмиру барқарорсозӣ аз рӯи нақша бомаром дар ҷараён аст.
Зикр шуд, ки бо истифода аз шароити мусоиди маблағгузорӣ қасри мазкур бо таҷҳизоту лавозимоти корӣ муҷаҳҳаз гардонида шуда, дар арафаи ҷашни 25-солагии Истиқлолияти давлатии Ҷумҳурии Тоҷикистон барои фарҳангчиёни ноҳия мавриди истифода  қарор дода мешавад.
Дар ин бора ба мухбири АМИТ  «Ховар» аз шуъбаи иттилоотию таҳлилии мақомоти иҷроияи ҳокимияти давлатии вилояти  Хатлон иттилоъ доданд.