Аз ҷониби ҶСП «Ҷунтай Данғара-Син Силу-Текстил» ба ДТТ 1000 дархост ворид гардидааст

Душанбе, 06.06.2016./АМИТ «Ховар»/. 4-уми май дар Донишгоҳи техникии Тоҷикистон (ДТТ) ба номи академик М.С.Осимӣ ҷиҳати тақсимоти хатмкунандагони соли 2016 чорабинӣ баргузор гардид. Дар чорабинии мазкур намояндагони вазорату кумитаҳо, корхонаву муассисаҳои таълимӣ, аз қабили Вазорати кишоварзӣ, Маркази барқу гармидиҳии шаҳри Душанбе, Коллеҷи техникии ДТТ, Литсейи техникӣ-нассоҷии шаҳри Душанбе, Агентии омори назди Ҳукумати Ҷумҳурии Тоҷикистон ва чандин намояндагони дигар иштирок намуда, ба хатмкунандагон  оид ба кор ва корхонаи худ маълумоти муфассал доданд.
Муовини аввали ректор, муовин оид ба таълими ДТТ Сафаралӣ Гадоев зикр кард, ки: «Соли равон зинаи якуми таҳсили (бакалаври) Донишгоҳро аз рӯйи 52 ихтисос 1744 нафар, аз ҷумла, 555 нафар буҷавӣ, 1189 нафар шартномавӣ ва 54 нафар аз тариқи квотаҳои президентӣ хатм менамоянд, ки то имрӯз аз ҷониби вазорату кумита ва корхонаҳо 1169 дархост барои қабул ба кор ворид гардидааст.
«Дархостҳои воридгардида аз ҶСП «Ҷунтай Данғара-Син Силу-Текстил» барои 1000 нафар, аз Комбинати полиграфии шаҳри Душанбе барои 10 нафар, аз  Гвардияи миллӣ барои 40 нафар, аз Литсейи касбии техникии саноатӣ-нассоҷии ш. Душанбе  барои 9 нафар ва аз чандин корхонаҳои дигар барои якнафариро ташкил медиҳанд»,- зикр кард номбурда.
Сафаралӣ Гадоев зикр намуд, ки: «Шахсоне, ки аз тариқӣ буҷавӣ донишгоҳро хатм кардаанд, бояд ба таври роҳхат ба корхонаҳои давлатӣ сафарбар карда шаванд ва дар он ҷо се сол ҳатман фаъолият намоянд. Шахсоне, ки аз тариқи квотаҳои президентӣ донишгоҳро хатм кардаанд, бояд ба ноҳияҳои мувофиқ, ки аз он ҷо  ба донишгоҳ фиристода шудаанд, рафта, се сол кор кунанд ва баъд дипломашонро гиранд».
Мудири шуъбаи рушди касбияти ДТТ Эмомиддин Тауров зикр кард, ки дар соли таҳсили 2015-2016 196 нафар аз рӯйи 13 ихтисос зинаи магистратураи донишгоҳро хатм менамоянд, ки аз онҳо 46 нафар буҷавӣ ва 150 нафар шартномавӣ мебошанд.