Ба сокинони аз офати табиӣ зарардидаи вилояти Суғд кумак расонида шуд

Душанбе, 06.06.2016. /АМИТ «Ховар»/.   Бо   мақсади шиносоӣ аз ҷараёни бартарафсозии оқибатҳои офати табиӣ ва расонидани кумакҳои моддӣ раиси вилояти Суғд  ба водии Зарафшон сафари корӣ анҷом дод.
Сафари кории Раиси вилоят ва дигар намояндагони мақомоти иҷроия ба водии Зарафшон аз аёдати оилаи Тӯйғуновҳо, ки бар асари омадани сел дар деҳаи Ревади ноҳияи Айнӣ модару фарзанд ба ҳалокат расида буданд, оғоз ёфта, ба ин оила ҳамзамон кумакҳои моливу моддӣ расонида шуданд.
Сипас роҳбари вилоят бо ҷараёни сохтмони манзилҳои истиқоматӣ барои зарардидагон дар мавзеи Дашти қозии ҷамоати деҳоти Ёрии Панҷакент шинос шуд. Дар ин ҷо аз тарафи мақомоти иҷроияи шаҳри Панҷакент барои 22 оилаи аз офати табиӣ манзилҳояшон осебдида замин ҷудо карда шуда, сохтмони хонаҳо идома доранд. Аз ҷумла, чор хонаи шаҳрвандоне, ки пурра вайрон шудаанд, дар ин мавзеъ ва хонаи ду шаҳрванди дигар дар худи деҳа дар ҷои бехавф азнав сохта мешаванд ва барои боқимонда дар бунёди хонаҳояшон кумакҳои моддӣ, аз қабили масолеҳи сохтмонӣ пешбинӣ шудаанд. Раиси вилоят ба масъулин дастур дод, ки дар муҳлати муайяншуда ва бо сифати баланд хонаҳои шаҳрвандон ба истифода дода шаванд. Инчунин зикр гардид, ки хонаҳои нав пурра бо ҷиҳози рӯзгор таъмин мегарданд.
Дар деҳаи Шӯрчаи ҷамоати деҳоти Халифа Ҳасани шаҳри Панҷакент барои сокинони ҷабрдидае, ки хонаҳояшон пурра хароб гардидаанд, бо дастгирии мақомоти иҷроияи ҳокимияти давлатии вилоят сохтмони хонаҳои нав идома дорад. Умуман барои сокинони шаҳри Панҷакент аз ҷониби мақомоти иҷроияи ҳокимияти давлатии вилоят 15 манзили истиқоматӣ бунёд карда мешавад.