Баргузории Рӯзи мусиқӣ дар Душанбе

Душанбе, 17.06.2016 /АМИТ «Ховар»/. Дар шаҳри Душанбе аз 23 то 25 июни соли равон чорабинии фарҳангии  Рӯзи мусиқӣ доир мегардад. Тибқи нақшаи тарҳрезишуда  рӯзи  нахустин, яъне  23-уми июн бо  намоиши дастовардҳои ҳунармандон таҳти унвони  «Булбулони Тоҷикистон» дар гулгашти шафати Театри давлатии академии опера ва балети Тоҷикистон ба номи Садриддин Айнӣ оғоз шуда, дар он  гурӯҳи ҳунармандон аз Кансерваторияи миллӣ ба номи Талабхуҷа Сатторов баромад менамоянд. Баъдан намоиши барномаи консертӣ бо иштироки сарояндаи фаронсавӣ  Оттили (Б) ба дӯстдорони санъати мусиқӣ тақдим мегардад.
Тибқи иттилои  Маркази фарҳангии «Бохтар» дар ҷумҳурӣ ҳамасола Рӯзи мусиқӣ гузаронида шуда, дар баробари ҳунармандони касбӣ, ҳамчунин дӯстдорону ҳаводорони мусиқӣ, онҳое, ки дорои овози хуши сарояндагӣ ва маҳорати баланди навозандагӣ  дар асбобҳои халқианд, имкон доранд  ҳунари хешро пешниҳоди тамошобинон гардонанд.