Бартарафкунии оқибатҳои офати табиӣ дар деҳаи Дарғи ноҳияи Айнӣ

Душанбе, 17.06.16./АМИТ «Ховар»/.  Раиси вилояти Суғд Абдураҳмон Қодирӣ   барои шиносоӣ бо корҳои бартарафкунии оқибатҳои офати табиӣ ба деҳаи Дарғи ноҳияи Айнӣ рафта, ба 20 оилаи зарардида кумакҳои пулӣ дар ҳаҷми 3 ҳазор сомонӣ  ва барои бунёди манзилҳои истиқоматии сокинон масолеҳи сохтмонӣ, инчунин хӯрокиву пӯшокӣ супорид.
Бояд гуфт, ки  13 июн бар асари омадани сел дар ин деҳа 20 хона осеби ҷиддӣ дида, беш аз 30 хонаи дигар қисман зарар диданд. Дар баробари ин 35 гектар замини кишоварзӣ хароб гардида, хаттҳои оби нӯшокӣ ва роҳҳои мошингард вайрон шудаанд.
Бо дастури раиси вилоят аз ҳисоби мақомоти дахлдор ситоди бартарафкунии офат ташкил гардида, ҷиҳати ташкили зиндагии муқаррарӣ дар деҳа тадбирҳои зарурӣ андешида шуданд.    Ва инчунин корҳои бартарафкунӣ дар ин мавзеъ дар муҳлати кӯтоҳ ба анҷом расонида мешаванд.
Дар ин бора аз Хадамоти матбуотии раиси вилояти Суғд хабар доданд.