Бинои МИҲД Рӯшон ба қабули кормандон омода аст

Рӯшон, 21.06.2016 /АМИТ  «Ховар»/. Бинои наву замонавии мақомоти иҷроияи ҳокимияти давлатии ноҳияи Рӯшон, ки соли гузашта хишти аввали он гузошта шуд, дар арафаи анҷомёбист ва бинокорон аз пайи ислоҳи баъзе аз корҳои ҷузъӣ машғул мебошанд. Иншооти мазкур аз 2 ошёна, 14 утоқи корӣ, як маҷлисгоҳи калон барои 260 нафар, як маҷлисгоҳи хурд ва сарои мошину ошхона иборат аст. Тарҳи биноро мутахассисони ҶСК «Пажӯҳишгоҳи илмӣ ва лоиҳакашию ҷустуҷӯӣ» таҳияю татбиқ  намуда, маблағгузории онро Дирексияи сохтмони иншооти ҳукуматии назди Дастгоҳи иҷроияи Президенти Ҷумҳурии Тоҷикистон бар дӯш гирифт. Барои бунёди ин сохтмон 6 миллион сомонӣ ихтисос дода шуд.
Устои ин сохтмон Саймурод Саидов гуфт, ки барои эъмори бинои мақомоти давлатии ноҳия ба мо як сол муҳлат доданд ва тавре ки мебинед, коргарон тавонистанд дар ин муддат сохтмонро ба итмом расонанд.