Дабири кулли СУТ СММ Толиб Рифоӣ: «Дар дили ман Тоҷикистон ҷои хос дорад»

Душанбе, 11.06.2016 /АМИТ «Ховар»/.   «Дар  дили ман Тоҷикистон ҷои хос дорад»,-гуфт  Толиб Рифоӣ, Дабири кулли Созмони умумиҷаҳонии туристии СММ дирӯз  зимни мулоқот бо донишҷӯёни Донишкадаи соҳибкорӣ ва хизмати Вазорати саноат ва технологияҳои нави ҶТ.
Бино ба гуфтаи Толиб Рифоӣ, ин ташрифи дуввуми ӯ ба ин донишкада мебошад.
«Вазифаи муҳими ман- ин бархурдор намудани мардуми хориҷа аз имконоти туристии Тоҷикистон мебошад. Тоҷикистон иқтидори пурқувват барои муаррифӣ карданро  дорад. Ман кӯшиш ба харҷ медиҳам, ки ин имконоти Тоҷикистонро ба   тарзи дуруст ба хориҷиён расонам»,- илова намуд Т.Рифоӣ зимни баромадаш.
Ба гуфтаи Дабири кулли Созмони умумиҷаҳонии туристии СММ, соҳаи туризм барои Тоҷикистон соҳаи зарурӣ маҳсуб мешавад.
«Бояд масъулини соҳа барои зиёд кардани теъдоди сайёҳон ба Тоҷикистон корҳои зиёдро анҷом диҳанд. Ин ҷо ғайр аз рушди соҳаи сайёҳӣ, инчунин ба тарғибу ташвиқ бояд диққати ҷиддӣ дод. Ташвиқу тарғиб ва рушди туризм бояд ҳарду якҷоя қадам зананд.  Барои ин бояд Тоҷикистон тамоми имконияташро истифода намояд ва ин соҳаро сармоягузорӣ кунад»,- гуфт Т.Рифоӣ.
Т.Рифоӣ афзуд, ки имрӯз бештари кишварҳои ҷаҳон аз фоидаи соҳаи туризм рушд мекунанд.
«Ман ба Тоҷикистон барои дидани  чеҳраҳои зебои тоҷикон омадам»,-илова намуд   Дабири кулли Созмони умумиҷаҳонии туристии СММ.