Дар ноҳияи Рашт биноҳои нав ба истифода дода шуданд

Рашт, 30.06.2016 /АМИТ «Ховар»/. Дар арафаи 19-солагии иди Ваҳдати миллӣ бинои маъмурии ҷамоати деҳоти Қалъанаки ноҳияи Рашт, ки дар деҳаи Белгӣ ҷойгир аст, бо иштироки масъулини ноҳия ва сокинону фаъолони ҷамоат бо тантана мавриди истифода қарор дода шуд. Бинои мазкур аз ду ошёна иборат буда, дорои 8 ҳуҷра ва маҷлисгоҳ мебошад. Инчунин ҳуҷраҳои бино бо таҷҳизоти замонавӣ ва таҷҳизоти гармидиҳӣ таъмин мебошанд.
Тибқи иттилои сармеъмори ноҳия Баҳром Саъдуллоев бинои кӯҳнаи ҷамоати деҳоти Қалъанак аз солҳои 70-ум боқӣ монда, айни замон садамавӣ мебошад. Аз ин хотир бинои маъмурии ҷамоати мазкур аз ҳисоби маблағҳои буҷети ноҳия бо маблағи 1 миллиону 400 ҳазор сомонӣ ба истифода дода шуд.