Дар вилояти Суғд масъалаҳои соҳаи маориф баррасӣ гардиданд

Душанбе, 17.06.2016 /АМИТ «Ховар»/. Дар ҷаласаи ҳайати мушовараи Раёсати маорифи вилояти Суғд, ки бо иштироки кормандони дастгоҳи Раёсат ва сохторҳои зертобеъ, сардорони раёсат ва мудирони шуъбаҳои маорифи шаҳру ноҳияҳо доир гардид, 14 масъалаи муҳими соҳа, аз ҷумла  натиҷаи рӯзҳои Раёсати маорифи вилоят, санҷиши сатҳу сифати таҳсилот ва иҷрои Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» дар муассисаҳои таълимии ноҳияи Спитамен, ҷараёни фаъолияти комиссияҳо оид ба татбиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» дар шаҳру ноҳияҳои Ҷ.Расулов, Истаравшан ва Панҷакент мавриди баррасӣ қарор гирифтанд.
Дар ҷаласа сардори Раёсати маорифи вилоят, доктори илмҳои таърих, профессор Осим Каримзода ҷиҳати таъмини саривақтии омӯзгорону хонандагон бо либоси мактабӣ, захираи сӯзишворӣ, ташкили истироҳати бофароғати мактабиён, таъмири муассисаҳои томактабӣ ва таълимӣ, сохтмони иншооти ҷашнӣ ҷиҳати истиқболи сазовори 25-умин солгарди Истиқлолияти давлатии Ҷумҳурии Тоҷикистон вазифагузорӣ намуд.