Даргузашти Хуршеда Отахонова

Душанбе, 23.06.2016 /АМИТ «Ховар»/. Субҳи имрӯз баъд аз беморӣ академики Академияи илмҳои Ҷумҳурии Точикистон, олими шинохтаи мамлакат Хуршеда Отахонова дар синни 84 аз олам даргузашт.
Хуршеда Отахонова соли 1953 Донишгоҳи давлатии Тоҷикистонро бо ихтисоси «филология — адабиётшинос» хатм карда, минбаъд фаъолияти босамари меҳнатии худро дар самти адабиёти муосири тоҷик, матншиносии адабиёти муосири тоҷик ва бойгониҳои адабӣ равона кардааст. Х.Отахонова ба сифати мудири шуъбаи мероси адабӣ (солҳои 1971-1989), мудири шуъбаи матншиносӣ ва нашр (солҳои 1989-2003), мудири шуъбаи адабиёти муосири тоҷик (солҳои 2003-2009), сарходими илмии шуъбаи адабиёти муосири тоҷик, мушовири илмии Институти забон, адабиёт, шарқшиносӣ ва осори хаттии ба номи Рӯдакии АИ ҶТ кор кардааст.
Барои хизматҳои шоиста бо медалҳои «Барои меҳнати шоён» ва «Ветерани меҳнат» сарфароз гардидааст.
Соҳиби Ҷоизаи Кумитаи кор бо занон ва оилаи назди Ҳукумати Ҷумҳурии Тоҷикистон «Олимаи соли 2006» мебошад.