Давлатшоҳ Гулмаҳмадзода: зиндагии арзандаву шоистаро барои мардуми кишвар фароҳам орем

Душанбе, 17.06.2016 /АМИТ «Ховар»/. Имрӯз, 17 июн дар мақомоти иҷроияи ҳокимияти давлатии вилояти Хатлон  дар доираи барномаи машварати омӯзишӣ  дар  мавзӯи «Мо роҳбарӣ меомӯзем» барои гирандагони стипендияҳои президентӣ, раиси вилоят, раисони шаҳру ноҳияҳо ва кормандони  бахшҳои ҷавонон, варзиш  ва  сайёҳии шаҳру  ноҳияҳои  вилоят   вохӯрии Давлатшоҳ Гулмаҳмадзода, раиси вилояти Хатлон бо иштирокдорони  он  доир гардид.
Қабл аз оғози  вохӯрӣ ҷавонон аз шуъбаву бахшҳои мақомот дидан намуда, бо  фаъолияти онҳо аз наздик шинос шуданд.
Дар  вохӯрӣ Давлатшоҳ Гулмаҳмадзода ҷавононро барои аз   имкониятҳои васеъ истифода бурдану баланд бардоштани савияи дониши хеш,  ҳамчун  мутахассиси баландихтисос ба воя расидан ва  дар ободиву созандагиҳои Тоҷикистони азиз саҳм  гузоштан даъват намуда, зикр  кард, ки мо бояд шукргузор аз фазои сулҳу ороми Ватанамон буда,  зери партави сиёсати хиратмандонаи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, муҳтарам  Эмомалӣ Раҳмон зиндагии арзандаву шоистаро барои мардуми кишвар фароҳам орем.
Раиси вилоят инчунин оид ба  фаъолияти мақомоти иҷроияи ҳокимияти давлатии вилояти Хатлон ва маҷлиси вакилони халқ дар сатҳи маҳал ва  коргузорию корбарӣ дар самтҳои мухталифи ҳаёти сиёсии давлату давлатдорӣ  маълумот дод.
Байни Д. Гулмаҳмадзода  ва иштирокдорони машварат суҳбати самимӣ доир гардида, ҷавонон ба суолҳои  худ аз раиси вилоят  посух   гирифтанд.