Фарди солим аз насли солим аст

Конибодом, 21.06.2016 /АМИТ «Ховар»/. Бахшида ба Соли фарди солим дар Коллеҷи омӯзгории шаҳри Конибодом ба номи Мирзо Турсунзода дар мавзӯи «Фардҳои руҳану ҷисман солимро тарбия мекунем» маҳфил баргузор гардид.
Донишҷӯёни коллеҷ бо барномаи ҷолиб баромад намуда, перомуни бемориҳои гуногун, аз ҷумла ВНМО (ВИЧ/СПИД), нашъамандӣ, сил, инчунин оқибатҳои никоҳи хешутаборӣ, пешгирии онҳо ва оид ба тарзи ҳаёти солим сухан гуфтанд.
Баъдан донишҷӯёни коллеҷ бо қироати суруду иҷрои рақсҳои ҷаззоб, саҳнаҳои ҳаҷвӣ аз нигоҳи илмӣ исбот намуда тавонистанд, ки бо таъсири ханда, шунидани оҳангҳои дилнишин, истироҳати бофароғат дар оғӯши табиат ва мутолиа низ бемориҳоро муолиҷа намудан мумкин аст. Баромадкунандагон тавассути баромадҳои рангин ба тамошобинон ёдрас намуданд, ки ба ҷомеа фарди солим зарур аст ва солимии ҳар шахс дар дасти худи ӯст. Тавлиди фардҳои солим  танҳо аз наслҳои солим вобаста аст.
Аз ин рӯ, кӯшиш бар он бояд кард, ки солимии миллат таъмин гардад. Дар баробари ин, дар ҳифзи солимии ҷомеа на танҳо табибон, балки тамоми қишри ҷомеа, аз ҷумла тарбиятдиҳандагон низ масъуланд, зеро маънавиёти ҷомеа аз муаллим вобастагӣ дорад.