Иди нав: 29 сентябр Рӯзи дипломатҳо

Душанбе, 22.06.2016/АМИТ «Ховар»/. Дар феҳристи иду ҷашнҳои Ҷумҳурии Тоҷикистон боз як иди  дигар зам гардид. 22 июн вакилони палатаи поёнии Парлумони Тоҷикистон ба лоиҳаи Қонуни Ҷумҳурии Тоҷикистон «Дар бораи рӯзҳои ид» илова ворид намуданд. Тибқи он минбаъд ҳамасола дар Ҷумҳурии Тоҷикистон 29 сентябр Рӯзи хизматчиёни дипломатӣ бидуни истироҳат ҷашн гирифта мешавад. Дар санаи 29 сентябр таҷлил намудани Рӯзи дипломатҳо барои мардуми тоҷик ҳамчун санаи таърихӣ арзёбӣ мегардад,  зеро 23 сол муқаддам, аниқтараш 29 сентябри соли 1993 Президенти Ҷумҳурии Тоҷикистон Эмомалӣ Раҳмон бори нахуст аз минбари Созмони Миллали Муттаҳид баромад намуда, Ҷумҳурии Тоҷикистонро ҳамчун кишвари соҳибистиқлол ба оламиён муаррифӣ намуд.