Кормандони Агентии назорати давлатии молиявӣ ва мубориза бо коррупсия ду ҳолати хариду фурӯши ғайриқонунии заминро ошкор намуданд

Душанбе, 21.06.16. /АМИТ «Ховар»/. Аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон ду ҳолати хариду фурӯши ғайриқонунии замин ошкор карда шуд.
Тавре ба АМИТ «Ховар» аз маркази матбуоти агентии мазкур хабар доданд, зимни гузаронидани чорабиниҳои фаврию ҷустуҷӯӣ муайян карда шуд, ки сармуҳосиби раёсати кишоварзии ноҳияи Рӯдакӣ Бобомурод Тураев дар асоси маслиҳати пешакӣ бо Аҳмадбек Нурмуҳаммадов ва раиси хоҷагии деҳқонии «Гулистон»-и ноҳияи Рӯдакӣ Олимҷон Садриддинов бо роҳи фиреб ба боварии шаҳрванд «Г» даромада, барои ҷудо карда додани 0,07 га қитъаи замини наздиҳавлигӣ аз ҳудуди деҳаи Оли Совети ҷамоати деҳоти Зайнабободи ноҳияи Рӯдакӣ, аз ӯ маблағи 9000 доллари амрикоиро талаб карда, аз маблағи талабкардаашон ҳамчун пешпардохт 4500 доллари амрикоӣ гирифта, онро тасарруф намудаанд. Нисбат ба Бобомурод Тураев, Олимҷон Садриддинов  ва Аҳмадбек Нурмуҳамадов бо моддаи 247 қисми 4 банди «б» КҶ Ҷумҳурии Тоҷикистон парвандаи ҷиноятӣ оғоз карда шуда, тафтишоти пешакӣ идома дорад.
Хамчунин  аз тарафи кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон сокини шаҳри Хуҷанд Абдусамад Ваҳобов дастгир гардид. Номбурда, ки ваколати ҷудо карда додани қитъаи заминро надорад, моҳи октябри соли 2014 бо мақсади тасарруфи молу мулки ғайр, бо роҳи фиреб ба боварии шаҳрвандон «Н» ва «Ф», ки мақсади гирифтани қитъаи заминро барои сохтмони фермаи чорвопарварӣ доштанд, даромада, аз онҳо бо ваъдаи аз ҳисоби заминҳои корами собиқ фермаи бурдоқипарварии хоҷагии ба номи «Раҳмон Набиев»-и ноҳияи Б.Ғафуров ҷудо ва ҳуҷҷатгузорӣ карда додани 3,5 га қитъаи замин барои сохтмони фермаи чорвопарварӣ 70 ҳазор доллари амрикоӣ талаб карда, аз маблағи талабкардааш 52 ҳазор доллари амрикоиро бо роҳи қаллобӣ гирифта, онро тасарруф намудааст.
Аз ҷониби кормандони Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд А. Ваҳобов  бевосита баъди аз шаҳрванд «Н» гирифтани боқимонда маблағи 22 000 доллари амрикоӣ дар ҷои ҳодиса дастгир карда шуда, маблағҳои пулӣ аз ӯ ҳамчун далели шайъӣ ёфта гирифта шуданд. Нисбат ба Абдусамад Ваҳобов  бо моддаи 247 қисми 4 банди «б» КҶ Ҷумҳурии Тоҷикистон парвандаи ҷиноятӣ оғоз карда шуда тафтишот идома дорад.