«Лада-Приора»: туҳфа барои мухлисони футбол дар бозии «Локомотив»-и Маскав ва «Истиқлол»-и Душанбе

Душанбе,13.06.2016 /АМИТ «Ховар»/. Тавре иттилоъ додем, бахшида ба 25-солагии истиқлолияти мамлакат бо ташаббуси роҳбарияти клуби футболи «Истиқлол» ва сафорати Федератсияи Русия дар Тоҷикистон Клуби футболи «Локомотив»-и Маскав 26 июн барои баргузор кардани вохӯрии дӯстона бо чемпиони чоркаратаи мамлакат- «Истиқлол» ба Душанбе меояд.
Бино ба хабари дафтари матбуоти клуби футболи «Истиқлол», ин вохӯрӣ соати 21 ба вақти Душанбе дар Варзишгоҳи марказӣ гузаронида мешавад. Дар ҷараёни гуфтушунид бо сармураббии дастаи «Локомотив», ҳамватани мо Игор Черевченко қарор ҳосил шуд, ки ба Душанбе ҳайати асосии дастаи «Локомотив» ҳозир мешавад.
Роҳбарияти дастаи «Истиқлол» барои хотирмон гузаштани ин бозии дӯстона барои мухлисони футбол бозии лотереяро низ таъсис додаанд, ки дар он мошини «Лада-Приора»  ва телефонҳои мобилии замонавӣ ба бозӣ гузошта мешаванд.
Ёдрас мешавем, ки аз ин пештар «Истиқлол»-и Душанбе чунин бозиҳои дӯстонаро бо клубҳои «Шалке-04», «Хассен-Кассел»-и Олмон ва «Газовик»-и Русия баргузор карда буд.