Мулоқоти Далай-лама XIV бо Барак Обама

Душанбе, 20.06.2016. /АМИТ «Ховар»/. «Ман хостори истиқлолияти Тибет нестам ва умедворам, ки гуфтушунид миёни намояндагони он ва ҳукумати Чин барқарор мешавад», — изҳор дошт Далай-лама дар мулоқот бо президенти ИМА Барак Обама.
Бино ба иттилои Кохи Сафед, зимни мулоқот ҳар ду ҷониб масъалаи вазъи тибетиҳоро дар Чин муҳокима намудаанд.
Б. Обама  нигоҳдории анъанаҳои пурарзиши динӣ, фарҳангӣ ва забонии Тибетро қатъиян ҷонибдорӣ намуда, ҳифзи ҳуқуқи тибетиҳоро дар Чин муҳим шуморид. Ӯ ҳамчунин ба ҷонибдории Далай-лама ба сулҳ ва инкори хушунат баҳои баланд дод.
Президенти ИМА ба муколамаи созанда ва мустақим миёни Далай-лама ва намояндагони он бо ҳукумати Чин ба хотири коҳиш додани ташаннуҷ ва ҳал намудани нофаҳмиҳо даъват намуд. Дар ин росто, Б. Обама бори дигар мавқеи ИМА-ро баён дошта, зикр кард, ки ИМА Тибетро ҳамчун ҷузъи ҳудуди Чин меҳисобад ва истиқлолияти онро пуштибонӣ намекунад.
Дар навбати худ, Далай-лама изҳор дошт, ки ӯ хостори истиқлолияти Тибет нест ва умедвор аст гуфтушунид миёни намояндагони он ва ҳукумати Чин барқарор мешавад. Президенти ИМА Барак Обама ва Далай-лама ҳамчунин оид ба муҳимияти муносибатҳои созанда ва самарабахши ИМА ва Чин ба созиш расиданд.