Мусобиқаи ҷумҳуриявӣ оид ба гӯштини миллӣ поён ёфт

Хоруғ, 20.06.2016 /АМИТ «Ховар»/. Бахшида ба ҷашни Ваҳдати миллии Ҷумҳурии Тоҷикистон дар Қасри варзиши шаҳри Хоруғ бештар аз 100 паҳлавон дар давоми ду  рӯз барои ба даст овардани унвони қаҳрамонӣ дар намуди гӯштини миллӣ талош варзиданд.
Сардовари ин сабқат Бек Хусрав гуфт, ки қабл аз мусобиқа дар ҳамин толор семинари назариявию амалӣ барои доварон баргузор шуд ва онҳоро  бо баъзе аз тағйирот дар усулу равияи гӯштини миллӣ шинос намуданд.
Ба гуфтаи сардовар, дар ин сабқат паҳавонон аз вилояти Бадахшону Хатлон ва навоҳии тобеи ҷумҳурӣ ширкат намуданд, танҳо  паҳлавонони суғдӣ иштирок надоштанд.
Дар вазни 70 кг  Комрон Мамадназаров, 90 кг Шакар Шакармамадов ва бештар аз 100 кг Рауф Зиёбеков мақоми аввалро ишғол карданд ва сазовори унвони чемпиони ҷумҳурӣ гардиданд.