Мусобиқоти волейболу теннис бахшида ба Рӯзи байналмилалии олимпӣ дар Душанбе

Душанбе, 24.06.2016 /АМИТ «Ховар»/. Дирӯз  дар шаҳри Душанбе бахшида ба Рӯзи олимпӣ мусобиқот оид ба волейбол ва теннис баргузор шуданд. Мусобиқаи волейбол байни мардон дар толори варзишии Донишкадаи тарбияи ҷисмонии Тоҷикистон ба номи ҷаҳонпаҳлавон Саидмуъмин Раҳимов барпо гардид. Теннисбозони наврас дар майдони Ширкати «Тоҷварз» рақобат карданд.
Ба ғолибон ва ширкаткунандагони мусобиқот сертификатҳои Рӯзи олимпии Кумитаи байналмилалии олимпӣ ва туҳфаҳои Кумитаи миллии олимпии Тоҷикистон тақдим гардиданд.
Ширкаткунандагони мусобиқотро котиби генералии Кумитаи миллии олимпии Тоҷикистон Баҳрулло Раҷабалиев ва ректори Донишкадаи тарбияи ҷисмонии Тоҷикистон профессор Шодӣ Сафаров бо Рӯзи олимпӣ табрик намуданд.