Намоишномаи «Хӯса ё навҷӯӣ дар сангистон» рӯи саҳна гузошта шуд

Душанбе, 20.06.2016 /АМИТ «Ховар»/. Ҳунармандони театри вилоятии мусиқӣ- мазҳакавии ба номи Ато Муҳаммадҷонови шаҳри Қурғонтеппа намоишномаи наверо бо номи «Хӯса ё навҷӯӣ дар сангистон» пешниҳоди дӯстдорони театр намуданд.
Аз маркази  матбуоти раиси вилояти Хатлон   иттилоъ доданд, ки дар қабули намоишнома сардори Раёсати фарҳанги мақомоти иҷроияи ҳокимияти давлатии вилояти Хатлон ва шӯрои бадеии худи театр ҳузур дошта, ба он баҳои баланд дода, иброз доштанд, ки рӯи саҳна омадани намоишномаи «Хӯса ё навҷӯӣ дар сангистон» айни муддаост.
Аҳли эҷоди театр намоишномаро бахшида ба 75-солагии драматург ва адиби шинохтаи тоҷик Нур Табаров рӯи саҳна овардаанд.
Намоишномаи мазкур аз рӯи асари Нур Табаров дар таҳияи коргардони ҷавон Эраҷ Султонзода рӯи саҳна гузошта шуд.
Намоишномаи «Хӯса ё навҷӯӣ дар сангистон»  басо ҷолибу пурмазмун буда, инсонҳоро ба некию накӯкорӣ, покизагию ростқавлӣ, адолатпешагӣ ва хештаншиносию ватандорӣ даъват мекунад,-зикр намуд манбаъ.