Норак: Маҳфили оммавӣ-маърифатӣ бахшида ба Рӯзи байналмиллалии мубориза бар зидди суиистеъмоли маводи нашъаовар

Норак, 24.06.2016 /АМИТ «Ховар»/. Дар госпитали шаҳри Норак бо ташаббуси шуъбаи рушди иҷтимоӣ ва робита бо ҷомеаи дастгоҳи раиси шаҳр дар ҳамкорӣ бо кормандони беморхонаи марказӣ таҳти унвони «Мубориза бо нашъамандӣ- масъулияти ҳамагон» маҳфили оммавӣ-маърифатӣ бахшида ба Рӯзи байналмилалии мубориза бар зидди суиистеъмоли маводи нашъаовар ва муомилоти ғариқонунии он доир гардид.
Дар чорабинӣ намояндаи Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон Алиҷон Каримов ва наздики 100 нафар намояндагони касбу кори гуногун, кормандони шуъбаҳои рушди иҷтимоӣ ва робита бо ҷомеа, маориф, корҳои дохилӣ, бахшҳои ҷавонон, варзиш ва сайёҳӣ, оид ба корҳои дин, танзими анъана ва ҷашну маросимҳои миллӣ ва як гурӯҳ  занон иштирок намуданд.
Дар маҳфил масъулин вобаста ба мавзӯи семинар доир ба оқибатҳои тиббӣ-иҷтимоӣ ва ҳуқуқии нашъамандӣ, барномаи ҳукуматӣ оид ба пешгирии нашъамандӣ, роҳҳои пешгирии нашъамандию  нашъаҷаллобӣ ва ташвиқи тарзи ҳаёти солим ибрози назар карданд.