Омӯзиши таърихи ниёгон

Деваштич, 27.06.2016 /АМИТ «Ховар»/. Дар доираи ҷашни Рӯзи Ваҳдати миллӣ ва 25-солагии Истиқлолиятии давлатии Ҷумҳурии Тоҷикистон дар ташкилоти ибтидоии ҳизбии Маркази назорати давлатии санитарию эпидемологии ноҳияи Деваштич ҳамоиши омӯзиши китоби «Тоҷикон дар оинаи таърих»-и Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон  Эмомалӣ Раҳмон доир шуд.
Раиси ташкилоти ибтидоии ҳизб Абдуманнон Баҳронов дар бораи тақвияти худшиносӣ ва ҳувияти миллӣ, арзишҳои ватандорӣ, таблиғу ташвиқи дастовардҳои мамлакат, тарбияи насли наврас дар рӯҳияи ватандӯстиву меҳанпарастӣ сухан гуфта, зикр намуд, ки Истиқлолиятро соҳиб шудан ҳанӯз кам аст, онро ҳифз намудан, пуштибонӣ кардан, тақвият бахшидан ва ҳамчун арзиши муқаддастарини давлату давлатдорӣ дарк намудан ва пос доштан зарур аст.  Истиқлолият- ин шарафу номуси ватандорӣ, ифтихор аз давлату миллати хеш ва талошу заҳмати бардавоми ҳар як фарди бедордили ҷомеа баҳри худшиносӣ, маърифат ва фарҳанги волост. Истиқлолият- ин хонаи обод, рӯйи сурх, сари баланд, зиндагии осоишта ва рӯзгори осудаҳолонаи ҳар фарди соҳибдавлату соҳибватан аст. Ин гуфтаҳо маҳз дар китоби Пешвои миллат «Тоҷикон дар оинаи таърих» таҳким ёфта, дар натиҷаи омӯзиши он ҳар як сокини мамлакат дар фикру дили худ эҳсоси ифтихори ватандориву хештаншиносиро пайдо мекунад.